عزوم الكبار تزود يوم الخطر يزداد
لو ان الصغار تضيق باصغر دعاويها
عيون العزيز تناهض الوهن والاصفاد
وعين الذليل ان شافت العز يعميها
حقوق العرب ما ترجع بخبرة النقاد
ولا بالشعارات وجزالة معانيها
وكان اكتفينا بالدعا حقنا ما عاد
ولا بالدموع ان كان سالت مآقيها
تبي حكمة السيف الذي يرعب الاوغاد
الاوطان غير السيف ما شي يحميها
فلسطين نفداها بالارواح والاولاد
ومهما بذلنا لاجلها ما نوفيها
سلامي عليها نابعٍ من صميم فواد
لكل القرى فيها وكامل بواديها
على القدس أولى القبلتين السلام يزاد
على المسجد الأقصى وباقي ضواحيها
سلامي لغزة واصلٍ لاهلها الاسياد
ونعم الرجال اللي عمت عين باغيها
صمود الجدود اللي تورث مع الاحفاد
نما في حما اشبالٍ عظيمة هقاويها
فيا كاتب التاريخ وقف على استعداد
وشوف بعيونك قصة الفخر وارويها
هنا منبع العزة هنا منجم الامجاد
هنا حاضر الأمة يبي حفظ ماضيها
هنا استنسخ التاريخ عنتر ولد شداد
وجاد الزمان بثلةٍ حي طاريها
هنا الجود معنى غير عن باقي الأجواد
تجود الاسود بروحها دون اراضيها
هنا للخيال حدود ماهي من المعتاد
لكن الحقيقة ما لها حد ينهيها
هنا ينشد المدفع قصيد بلسان الضاد
ومن بعده ترد البنادق باغانيها
هنا يضحك المسجون ويبكّي الجلاد
والأشجار والأحجار تردع معاديها
هنا يتعب الشاعر ويعجز عن التعداد
ليا حاول يعد المآثر واهاليها
فلسطين دامت شوكةٍ تنخز الحساد
بها كل حاجة غير من فضل باريها
عسى الله ينصرها ويهلك اهل الأحقاد
وترجع لنا حرة بكامل نواحيها
عسى الله يشفي جرحها والنزيف الحاد
وتبقى ترف اعلامها في روابيها
درواس السراج
